Bald i af mei Diandl denk
Und auf ihr Schen,
Aft geit's ma ban Herz an Stih
Und ban Arsch zween.

Und wann is mei Diandl
Ban Tanzn nit hals,
Is nettar als wann d'Bäurin
Die Nudln nit schmalzt.

Und wann is mei Diandl
Ban Tanzn betracht,
Gfreut mi allweil der Man
Der die Arbat hat gmacht.

Aba das Diandl muaß i ham,
Die is schen ghoam,
Und die wicklt sie gar so gschmah
Umar um oan.

I wollt 's Wasserl gern watn,
Wann's nit so tiaf war,
I wollt's Diandl gern gratn,
Wann's nit so liab war.

Znachst han i halt beicht,
I grat 's Diandl nit leicht.
Sagt da Pfarrer zu mir:
Es geht ma netta wiar dir.

Mei Herz und mei Sinn
Und mei ganzer Verstand
Leit ban Diandl in' Bett
Auf an Häuferl beinand.

Tralalala,
Is mei Moringgeber
Und mei erster Gedanke,
Wia's mein Diandl wohl geht.

Mei Diandl ihr Bäucherl
Is weiß wia da Schnee.
Und unter ihrn Bäucherl -
Na, ös wißts es ja eh.

A niglnogl neues Häusl
Und a niglnogl neues Bett.
Und a niglnogl neues Diandl
Hat si a za mir glegt.

Juhe ba da Zidern,
Juhe ba da Geign
Und juhe bei mein Diandl,
Wann i auffi muaß steign.

A Zidern, a Geign
Und a Seitlpfeifn,
Und hiazt muaß i mein Diandl
Gschwind 's Mudl greifn.

Heunt Nacht hat ma tramt,
I han 's Rösserl einzamt,
Han 's eingspannt in Wagn
Und bin za mein Diandl gfahrn.

Und wann i da Toifl war
Und hiat' sei Macht,
Aft holert i mar alle Tag
Mei Diandl auf d'Nacht.

Tausendmal denk i dran,
Wia mei Schatz busseln kan
Und wia's mar einabrennt
Bis auf die Zähnd.

Da Steg hat si griglt,
Er hat si scho draht.
War ma load um mei Diandl,
Wann's ohafalln tat.

s' Lieserl ban Bah
Schreit mar alleweil nach,
Schreit mar alleweil zua:
Sei na lustig, mei Bua !

I bin da seg Bua
Laß in Mentschan koan Ruah,
Laß in Mentschan koan Fried,
Is' eahn recht oder nit.

Znachst han is pstn ghert,
Pstn ban Zaun.
Bald is no amal pstn her,
Aft geh i schaun.

Aba gestern auf d'Nacht
Han i lacha müassn.
Han i glaubt, i han 's Mentsch,
Dabei han i d'Katz ban Füaßn.

Gestern ban Schlittnfahrn
Han i mei Mentsch verlorn.
Den soll da Toifl holn,
Der mar's hat gstohln.

Znachst bin i halt ganga
In Teixl - Teixl.
Und a Mentsch ahn i gfanga
In an Voglhäusl.

Holz übern Grabn
Und a Mentsch muaß i habn
Und an Steigbügl dran,
Daß i auffisteign kann.

Tralalafix,
Und a Mentsch und sist nix,
Mit an Steigbügl dran,
Daß i auffisteign kann.

Tralalafix,
Und a Mentsch und sist nix,
Und a schene Schiaßstatt,
Daß i drauf schiassn mag.

Hiazt is a Mentsch dafragt,
Die gwiß koan anern mag.
Das war a Seltnheit
Dei dera Zeit.

Und hiazt wiar i oans toan
Und a Bauernmentsch liabn.
Und aft han i in Herist
Gmuag Äpfl und Birn.
Schen kurz und schen dick,
Und schen nudlat um d' Mitt
Und schen rot in d'Wanga,
Das is mei Valanga.

Hiazt han i mei Treuheit
In Gartn anbaut.
Es is nix aufgangan
Wia lauter Unkraut.

Und hiazt liab is a Klosterfrau
Über neun Stiagn,
Und hiazt kann mi da Hölltoifl
A neama kriagn.