Mei Vader is a Holzknecht
Und geht in' Wald.
Und mir hackan insre Bamlan um,
Sand's jung oder alt.

Mei Vader is a Metzger,
A Metzger bin i.
Mei Vader sticht Kaibln,
Die Diandlan stich i.

Mei Vader is a Tischler,
A Tischler bin i.
Mei Vader macht Wiagn,
Was eini ghert, mach i.

Mei Vader hat Antn,
Mei Muatter hat Gäns.
Und mei Bruader, das Luader,
Hat a schon a Mentsch.

Wann mei Muatter a Gückin war
War mei Vader a Guck,
Und mei Schwester a Gücknkind
Und i a junger Guck.

Mei Bruader spielt Zidern
Und i Klarinett.
Da Vater schlagt d'Muatter,
Das gibt a Quartett.

Mein Bruadern ham's eingsperrt,
Mei Vader is a Lump,
Mei Schwester sitzt in Zuchthaus,
Aba sinst san mar gsund.

Mei Vader hat's Haus verkauft
Und in Hof a,
Und hiazt gehts übern Goaßbock los.
Alleluja !

I und mei Vader
Hamd d'Ochsn verkauft.
Nothalber nit,
Aba 's Geld ham ma braucht.

Das is halt mein Vadern
Sein oanziger Trost,
Das eahm, solang i leb,
Sei Geld nit verrost'.

Mei Vader hat gsagt,
I söllt besser hausen.
I söllt d'Katz verkaufen
Und selber mausen.

Mei Vader hat gsagt,
I söllt Stiefi wichsn.
Han ihn falsch verstandn,
Han i eahm einigschissn.

Furt in da Früah, hoam auf d Nacht,
So hat's da Vader gmacht.
Furt auf d'Nacht, hoam in da Früah,
So machens mir.

Und heunt gehr i nit hoam,
Moring a nit, moan i.
Mei Muatter mecht moan,
Und i kriagat koane.

Das is halt mein Vadern
Sei oanzige Freud,
D´ß er ar an Buam hat,
Der ban Mentschan gern leit.

Und i bi halt mein Vadern
Sei Bua, da mitta.
Und er muaß mi halt öfter
Zan Mentschan schicka.

Mei Vader hat gfragt,
Wo mi d'Liab a so plagt,
Wo mi 's Mentsch a so gfreut,
Daß i nia dahoam bleib ?

Mei Vader hat gsagt,
I sollt d'Mentscha gern habn.
Und mei Muatter hat gmoant,
Is sollt s' nehma ban Kragn.

Zwoa schwarzbraune Ochsn
Und a gscheckate Kuah.
Und das geit ma mei Vader,
Bald i heiratn tua.

Wann da Herrgott mei Vader war
Und Petrus mei Göd,
In Himmerl müaßt is eina,
War's eahm recht oder net.