Aba daß d'Bauern Bauern sand,
Das macht da Pfluag.
Aba daß d'Bauern rauschig sand,
Das macht da Kruag.

Da Bauer is a Spitzbua,
Wann er scheißt, druckt er d'Augn zua.
Wann er ausgschissn hat,
Steht er wieder grad.

Und wann is a Keuschler war,
Und hiat' a Goaß,
In Tag a Maß Müli,
Das war mar a Gspoaß.

Beim Giggl han i Goaß ghaltn,
Bin is a nit lang bliebn.
Is a kohlrabnschwoarzer Schwabnkäfer
Über d'Mülisuppn übergstiegn.

I han Holzapflan gspunnar
Und Schnupftawak klobn,
I han Boscheider ghachlt
Aufn Damkogl obn.

Und da Holzknecht in Wald,
Der hackt, daß alls knallt.
Und da Bauer in Tenn,
Hockt drin wiar a Henn.

Daß d'Holzknechtbuam lustig sand,
Das glaub i gern.
Sie baunt eahn a Riesal
Zan Holz ohakern.

Mei Schatz is a Holzknecht,
I kenn ar in Schlag.
Er hat a klingate Hacka
Und a sausate Sag.